بيجاسوس المصرى

حكاية غريبة بتحصل كل سنة و فى نفس الوقت ده و معرفش ايه السبب , بس قولت انا لازم الاقى ليها حل السنة دى و يا قاتل يا مقتول
الدنيا كلها ادامى ورق مسطر , امشى فى الشارع الاقى ورق مسطر
انام الاقى ورق مسطر, حتى ماتشات الكورة الارض الخضرا بقت ورق مسطر و مش عارف ليها سبب
لحد ولاد الحلال دلونى على الشيخ شخبوط بن بطوط استاذ و ماجستير فى فك الاعمال و الاحجبة و بسرعة رحت على الشيخ شخبوط و قالى على لوازم الجلسة من بخور و غيره ,بس شدتنى حاجة غريبة انه طلب قلم فرنساوى جاف بيكتب به طالب ذكى و متفوق و ده مستحيل انى الاقيه و الطلب التانى قلم نص ملى بتاع طالب فى اولى ابتدائى
و بعد جلسة استمرت ساعتين و خمس دقايق مراجعة كان السبب هو انى عليا عفريت اسمه امتحانات و علشان ينفك العمل لازم اذاكر كويس و اكتب بالقلم الفرنساوى فى الصبح و بالنص ملى بالليل
و قال لى بالحرف الواحد : اياك و اياك تدخل على المدونة لحد ما تخلص الامتحانات لان البيتا بلوجر اصلا واحد من الاسياد و لو بلغنى انك دخلت عليها يبقى انسى المدونة
فقلت استحمل لحد ما اخلص الامتحانات و امانة ادعولى يا جماعة و انتم بتصلوا

و اشوفكم بعد اسبوعين علشان نفتح مع بعض اولى ملفات الاهمال فى الصعيد و التى ارسلها الى روح شهيدة الطريق و التى حملت جسمانها قبل ان تفارق حياتنا بلحظات