حدوتة شروق و أبو الملوك

بالرغم انى مليش فى حوارات عيد الحب و الكلام عنه بس هحكى حكاية ليا من حوالى سنة بالظبط قولت اكتبها فى مدونتى احكى فيها عن قصة مريت بيها بس الكلام ربما يكون مبهم بس انا عارف ان شخصيات الحكاية عرفين نفسهم كويس قوى و انا عارف انهم هقرأو كلامى بس مهم ، المهم عندى انتوا يالا مع بعض نحكى الحدوتة
حدوتة صغيرة بسيطة ملهاش الا شهور عديدة ، حدوتة واحدة جميلة أسمها شروق و واحد بيحاول أنه يشتريها أسمه أبو الملوك.
و من شهر و فى وسط المدينة و وسط حرسها و أساتذتها و معلميها أخدت شله من الاصحاب اللى هيسبوا المدينة يحتفلوا و يغنوا لانهم بعد خمس سنين مذاكرة هيطلعوا لدنيا جديدة ، المهم و فى يوم الحفلة كان من ضمنهم واحد أسمه (زرزور) كان بيحب جميلة لسه داخلة المدينة مكملتش شهور ، شروق الشمس ده أسمها و هى فعلا شروق و اليوم اللى يعدى من غير ما يشوفها كان يبقى يوم كئيب ملوش نور ، راح جرى عليها و هو متذوق و شعره متسرح زى الحرير يقولها على حاجة بيخفيها قلبه أيام طويلة و ياريته ما راح و كانت الصدمة شديدة.
لانه لقى أبو الملوك قدم الجواهر و الاراضى تحت رجلها و بالرغم أنه يقدر يعمل كده إلا أنه قال عمر ما الحب أشتريه بالمال كده ،و الحفلة شغالة و (زرزور) مش عارف هو بيضحك على أية و أخذته الهستريا و برده بيضحك و الله أعلم بيعمل كده ليه و زمايله يهتفوا بصوت عالى :- أطلع مثل بقى المسرحية ، أحنا صبرنا كتير عليك و عايزين نضحك بقى شوية و أنا نسيت أصلا هو الدور بيتكلم عن أية لكن فضلت أمثل و الناس تضحك و أنا قلبى من الدموع هيتخنق ، بس ده طلب أصحابى و طلبهم أوامر يا بيه
و فضلت شهور كتيرة و كل يوم يشوفها يفرح و يتنطت لكن عيونى من الحزن بتعيط و من الفراق هتولع ، قفلت على قلبى بسلاسل و تلات أقفال ، قفل المحبة و قفل العطف و قفل الحسن و الجمال و سبتها و بعدت عنها بمرور الايام ، لحد ما كله أتنسى و بمشرط جراح تالم قطعت كل شرايين الشوق و الحنان فأنتهى حتى بنا الكلام و السلام و دارت علينا الايام.
و لحد أخر ساعة ليا فى المدينة قلبى شفها قبل ما عينيا تلاحظها و من غير تردد قلبى قالى :- روح سلم عليها و قولها هتوحشنى و ربنا لا يعودها أيام ، أيام عيشتها فى فراغ الكون مش لاقى حدود و لا مكان و بصوت عالى قولتها يا شروق خلى بالك من نفسك و فكرى كويس قبل ما الفأس تقع فى الرأس و الايام تروح و نرجع ندم و نقول ياريت اللى جرى ما كان و ممكن تلاقينى أدامك تانى بعد سنة او اتنين او ممكن ايام.
انا عارف يا أبو الملوك أنك هتقرأ اللى كاتبه و هتشتكينى لطوب الارض كلهم بس نصيحة من اخوك الكبير أنا بعدت خلاص من زمان و قلبى بقى حته حجر ما بقاش بيحس بالحب او شوق الايام ، و خليك واثق من نفسك و انت بتتكلم و أوعى تحط نفسك فى مقارنة يا بنى ، لان إيش جاب لجاب ، انت قوى بتشترى القلوب بالجاه و السلطان و أنا ضعيف كل ما أملكه قلب مجروح و مفتاح الصبر من الايمان

عرفت بقى ليه وقفت التدوين لفترة يا أنسان